當年今日
關於我們

【告別短途馬王】蘇保羅私下收起 友瑩格一份紀念品!

蘋果日報 2017/06/18 10:17

蘇保羅友瑩格

香港前短途馬王「友瑩格」日前光榮退役,相對起昔日宿敵「大運財」遠征法國不幸斷腳陣亡,「友瑩格」全身而退,並將運返出生地新西蘭安享晚年,能夠喺大草原自由奔馳,的確係福氣。

喺2014/15馬度,「友瑩格」先後攻下香港短途錦標、日本高松宮紀念賽同新加坡KrisFlyer國際短途錦標,是史上唯一香港馬一季內於三地勝出國際一級賽,奈何該季「步步友」氣勢更強,因而失落香港馬王寶座,少少可惜在所難免。

蘇保羅憶述15年「友瑩格」首次遠征,作客日本出戰高松宮,最怕嘅唔係主隊對手,而係當地天氣,賽前連續多日落雨,令場地大爛,對「友瑩格」變化地適應能力有極大懷疑,賽前非常擔心,但當馬兒陣上首先衝線後,所有疑慮當然多餘,不過到今時今日,如果沙田落雨,練者仍然主觀感話:「『友瑩格』跑天雨場地我估佢會打折扣!」

今季初香港短途錦標跑乾快地,「友瑩格」力拒「幸運如意」贏出服役最後一場頭馬,賽前馬匹亮相圈有新安排,每匹戰馬都有一個大告示牌,印上中英文馬名、編號同綵衣。
當日贏馬頒獎後,蘇保羅返老還童,立刻跑番入亮相圈搵番該告示牌,話贏馬非常驚喜,要放喺屋企留念,物輕情義重,呢一件亦可能係「友瑩格」送畀練者最特別嘅禮物。