韓國女團AOA近日陷入最困難嘅時期，成員草娥日前單方面喺Instagram留言話為咗治療失眠及抑鬱症而決定退團，當時AOA所屬嘅FNC事務所就回應，公司尊重草娥嘅意向，不過現時立即退出抑或之後先退出，當中仍需要跟草娥討論相關細節。

而今日韓國方面就傳來消息，草娥已經同FNC達成共識，已確定退團，FNC方面就話：「因為屬於公司內部事宜，目前就唔能夠公開，如果雙方有新嘅消息，稍後會發出聲明。」事實上有指草娥現時同大佢5歲嘅羅津產業CEO李錫鎮打得火熱，日前仲被拍得同遊日本返韓嘅照片，有網民發現草娥於今年開始就疑似戴上結婚戒指，似乎有機會為了嫁人而退團。

當FNC方面仲未肯透露草娥係唔係退團之際，韓國傳媒就報道AOA中人氣最高嘅成員雪炫近期同FNC已經完成續約，據了解雪炫好想守護住AOA，所以喺合約未到期前已一早續約。不過FNC方面就指雪炫嘅合約仲有一段時間先滿約，所以唔知點解會有咁嘅報道。

而FNC今日下午亦發表官方立場，確認草娥退出AOA，並指FNC會尊重草娥退出嘅意願。