但畢竟受過修女教育，佢嘅言行循規蹈矩，久唔久就到教堂坐吓，讓內心得到寧靜。呢日佢到中環辦事，行到腳軟，下午五點幾就行咗入花園道聖約翰大教堂，閉目靜坐，覺得內心非常安詳，十分鐘後，游目四看，見到前幾排有外國人，睇緊聖經，左邊一排，有一位三十零歲嘅女士，貌似OL，居然攤開報紙睇。沙田陳太覺得入到教堂，公然睇報紙，係對主耶穌基督不敬；如果要睇，教堂出邊有小花園，坐響度咪睇到夠囉。陳太老馬有火，向教堂職員投訴，職員面有尷尬之色，立即走埋OL身邊講幾句，OL立即收埋張報紙唔睇。
離開聖約翰大教堂，沙田陳太坐一○四巴士過海，喺紅磡上火車，搭頭等，貪坐得舒服也。去到旺角，頭等已經冇晒位，但仍然有人逼入嚟，一對夫婦竟然攜帶一張紅A塑膠櫈，女士擺低張櫈喺車卡門口附近就坐低，其他乘客為之愕然。咁樣坐法，好危險，除咗容易傾倒之外，對乘客上落亦甚為不便。沙田陳太睇到眼定定，覺得香港人係唔係愈來愈自我，自己鍾意就得，唔使理會別人觀感呢？