明年中旺角商廈巨無霸朗豪坊就會落成，到時整個社區會有好大變化，中原地產商舖部總經理潘志明更形容為革新年代，佢估計當一啲好似五金舖、麻雀館等撤離後，區內商舖租金同售價，至少有三成升幅，區內商場面對日漸劇烈嘅競爭，自然要想辦法搞搞新意思。
好似前身係華潤百貨，現在間細成二百幾間舖，每間一百到千五呎，走年輕人路線嘅潮流商場「新之城」，地庫落實租畀遊戲機集團，月租六十萬，一至三樓分別劃分成為時裝、精品，同售賣電話、電腦等高科技產品樓層，呎租七十至三百蚊，包管理費、差餉、同冷氣費（地庫同地下商舖除外）。
潘志明話，業主先推出四十間商舖招租，測試吓市場反應，第二期會喺暑假招租，租金重可能會提高㖭。事實上業主預期新之城翻新後，每年可以收到七千萬租金，較原本多一倍。

建造工程隨市縮水
樓價連跌幾年，供應就有增無減，搞到發展商都冇心機起樓。政府最新公布數據顯示，主要承建商第一季完成嘅工程中，私人地盤建造工程價值，只得九十二億，比舊年同期少百分之七。
啲數字有乜微言大義，大家都心裏有數，建築工人要有心理準備，開工率可能會少啲嘞。舊年全年私人地盤嘅建造價值係四百二十三億，平均每一季約莫一百零億。