K2就考劍橋試 - 左丁山

蘋果日報 2011/02/23 00:00


上星期五講及一個幼兒生到深圳參加劍橋英文試,一位讀者F來郵(英文)通知,考試叫做CambridgeYoungLearnersEnglishExamination(簡稱YLE),香港有舉辦,由英國文化協會及英基(EnglishSchoolsFoundation)主辦,考試費六百元。讀者F又話不少劍橋YLE考試資料在網上一搵即有,有啲係免費嘅。之後又有兩位讀者來郵,一位話:「你今日提及的幼稚園,我女兒也有參加,但考試是去東莞……」另一位講得更詳細,節錄如下:
「呢個試全名叫─CambridgeYoungLearnersEnglish(YLE)
唔係香港唔辦,英基及BristishCouncil都有得報考,只係香港規定要足5歲至准考;如小女年底出生,考得已經係K3,考完等得成績都已經交晒各大學校嘅入學申請表,profolioshow唔到成績,仲要預時間考得唔好,要重考;聽聞九龍塘×××會為該校生開特訓班,轉攻starter(額外俾多3千幾permonth),等小朋友全部K2就有starter張cert,準備K3一開學就可以報學校用;佢地可以開班,但佢地改唔到規矩,年齡又唔似得國家隊可以做假,所以就帶隊去深圳考;我都唔係好明點解香港有規定5歲至可以考,而深圳無。」
乜嘢世界呀,申請入小學竟然要有profolio,讀K2(四歲)就要考YLE,唯有嘆一聲,呢個唔知係乜世界。硬係唔信自英幼─英小─英中─英大(或牛津劍橋哈佛耶魯)呢個上升軌道出身嘅學生,係零舍叻啲,零舍有成就嘅。二月十七日有一段有趣法庭新聞,男拔萃校長張灼祥被傳召上庭當證人。被告係前律師嚴厚明女士(46歲),在法庭開審後先至到庭,法官叫佢與張校長傾吓先,點知張校長話:「我唔識你噃?」女律師話:「我係Maryknollo架。」真係牛頭唔搭馬嘴,法官准張校長立即鬆人,嚴女士承認兩項偷竊罪,但點解叫男拔校長做證人呢?男拔與瑪利諾有特別良好關係乎?自細讀好英文,著名女校出身,做咗律師,咁又點?