日本組合AKB48前晚喺官方網站公佈，指2012年成立嘅上海姊妹團SNH48喺當地營運商單方面違反合約，未經日方同意私自成立北京嘅BEJ48同埋廣州嘅GNZ48，激怒日本AKB，所以AKB官方網站已全線移除所有SNH48嘅相關連結。

奇就奇在……強國SNH48方面啱啱都發咗聲明回應事件，聲稱並冇存在違規，組合日後會照常活動，仲強調組合着重原創音樂。但日方連「割席」聲明都出埋，強國SNH48又照常運作……

喺強國呢個咩都有可能發生嘅……噚日《南都娛樂週刊》聲稱「獨家」搵AKB48創始人主動致電慰問，仲話理解並支持強國SNH48走原創道路。吓吓吓!!

據呢個內地報道就話日本AKB48創始人之一芝幸太郎先生代表同原AKS公司社長Kubota(窪田康志)致電SNH48運營方，針對官網刪link一事，就話「完全理解並支持SNH48的原創戰略，因為這是中國粉絲所期待的，SNH48在中國發展的非常好，運營上非常成功、今後也前途無量，已經超出了我們當初的預期，也完全不存在所謂違規問題」。

內地報道又話芝幸太郎先生同社長Kubota完全支持SNH48嘅立場同願意親自證明，只係由於AKS內部股權發生變化，因此芝幸太郎先生對AKB48官網公告「割席」，AKB48創始人完全唔知情，亦覺得好遺憾，又話AKB48董事會內部嘅戰火已經燒到SNH48。即係暗示SNH48係內部戰火嘅犧牲品。

不過，有心水清嘅網民就覺得呢段報道有疑點，因為芝幸太郎同社長Kubota自從2013起，因文春爆出涉黑同挪用公司資金，Kubota已淡出同離任(新聞連結： http://bit.ly/1OhzI91 )!?