數近排最紅見習騎師非巫顯東莫屬，今天（17日）佢於沙田馬場繼續有貨交，在第四場四班泥地短途1200米，接手徐雨石馬房大熱門「豹子頭」，順利為呢匹新勝馬取得連捷，今場單Win及組合獨贏A1分別派27.5及14元。

連同「豹子頭」在內，巫顯東在近5次賽事3次有馬贏，獲5Win之多，延續自己近日旺勢。而三歲馬「豹子頭」服役兩戰兩勝，全是泥地1200米，是新一代泥地新星。

「豹子頭」上仗首次出賽，配何澤堯爆7.7倍半冷贏馬，今仗賽前何澤堯自爆自己今場並非揀騎「極速銀桂」，而是徐雨石早已同佢講，「豹子頭」會改配見習騎師，以抵銷磅位增加，換言之何澤堯是被飛。

今勻「豹子頭」換上有七磅受讓的巫顯東，變成2.7倍大熱，排檔則是4檔，同上次3檔起步形勢相若，結果人馬初次合作即一放到底，贏1.5馬位，順利連捷而回。值得一提，巫顯東與徐雨石一嫩一老騎練，近三次攜手建功都在泥地，之前兩Win分別為「老友記」及「勇冠多」。

今日暫跑過兩場泥地賽，兩匹頭馬第三場「自由旺」、第四場「豹子頭」均一放到底，後上馬完全冇得追。

第四場二至四名順序是「烽煙四喜」、「智愛」及「極速銀桂」，四重彩派一萬蚊鬆啲。