當年今日
關於我們

隔牆有耳:大遊行買到飽 - 李八方

蘋果日報 2009/07/02 00:00


難得有日假期,7.1仲有咁多人上街真係令人驚喜,不過香港人始終唔係政治動物,遊行之際都要搵其他世藝搞作。香港係消費城市,遊行不忘購物,所以噚日幾萬人一於行到邊買到邊,人人買餐飽,一次過滿足兩個願望。
遊行集合地點維園係購物第一站,如果定力唔夠,隨時未行到入球場企定就清袋。民主黨、社民連在維園入口賣T恤,公民黨唔執輸,在港鐵站外擺檔搶頭啖湯,黨魁余大狀係生招牌,賣衫兼賣自己本書,十分落力。社民連毓民亦好有號召力,八方現場所見,路經其檔口唔打開銀包者冇幾多人,真係盤滿缽滿。
empty
政黨7.1T恤賣到斷晒貨,好過擺年宵。李家皓攝
empty
公民黨鄭宇碩(右)喺維園外擺檔籌款。劉耀輝攝
民主黨進賬30萬
民主黨亦唔弱,噚日埋數,全日賣物兼籌款,共有30萬元進賬,較去年11萬多唔止一個開,遊行對內需有貢獻,唔係斷估嘅。至於其他團體賣六四書、民運書,生意都似乎不俗,好多人六四燭光集會時向隅,噚日都大破慳囊買番夠本。
噚日陽光猛烈,有網上電台賣遮頓成搶手貨,職工盟幾年前搵九龍皇帝賜墨寶,印成快勞同T恤,存貨多今年繼續賣。出發前未買夠,遊行途中大把機會入手,因為各政黨、團體在遊行路線沿途都有街檔賣嘢。遊行常客王先生滿載而歸,佢話以前7.1遊行冇咁多嘢賣,近年越來越多,由於價錢唔係太貴,所以佢多數會買吓,作為見證歷史嘅紀念品。
小食亭生意麻麻
部份以為可以發遊行財嘅店舖,今年似乎失預算,維園小食亭擺出好多飲品售賣,然而幫襯者唔多,因為遊行人士多數自備飲品;而沿途士多、便利店生意亦冇明顯多咗,有店員話天氣熱,好多市民遊行前已預備多咗飲品,中途都唔使補充。
雖然如此,八方都發現有逆市奇葩,就係一間位於灣仔嘅茶餐廳,呢間茶餐廳個舖位,以前係《大公報》門市,之前幾年7.1遊行,都係市民「衝擊」目標,警方都要駐重兵防範,後來《大公報》搬走,門庭頓時冷落,今年變身茶餐廳,無懼市民衝擊,反而成為遊行人士補給站,八方見到唔少人都入去食個tea,唞一唞先再起程。
mailto:[email protected]