現時韓流盛行，好多歌手為咗叼吓韓星嘅光，都會忍唔住「借」吓韓星嘅橋放落自己嘅作品度。

不過，近日一個印度女歌手AkritiKakkar就被發現喺自己首歌《RingDiamondDi》個MV入面唔只「借」韓國女天團少女時代（少時）舊作《TheBoys》嘅橋咁簡單，而係抄到一模一樣。

喺Akriti個MV一開頭就已經同少時《TheBoys》嘅MV場地似到十足，都係以雪地為主，之後鏡頭就近鏡影住隻閃閃高跟鞋踩落地，都係照抄《TheBoys》。

期後Akriti就以白長裙現身，再踎喺地下執起件寶石，成個畫面同允兒喺《TheBoys》入面嘅動作一模一樣，之後Akriti同一班女dancer跳舞、佢企喺人群之中打開手、望住從天而降嘅玫瑰花瓣等場面，所有服裝、場地、概念等完全係倒模少時。

《TheBoys》都唔止，Akriti仲好醒咁喺MV另一幕，佢着住白衫牛仔矮褲喺粉紅色背景下跳舞嘅畫面就抄少時另一個MV《IGotABoy》，可惜都係被網民識穿咗。

對於Akriti扮「山寨少時」，網民都鬧爆話嘔心，仲話希望少時所屬嘅SM事務所對Akriti作出抄襲起訴。