張家輝跟鄭秀文(Sammi)合作嘅新片《失戀急讓》將於月底上映，戲中飾演地產經紀嘅張家輝重拾化骨龍風采，同Sammi既有床戲，又有激嘴鏡頭。飾演佢個女嘅楊穎(Angelababy)甘願醜化自己上陣。喜劇自然多NG，更有一條家輝心口快快疑似粗口片流出。

喺流出嘅5條NG片中，以家輝同Sammi因為賣樓問題爭執最有睇頭，家輝一時激動講咗句：「如果賣樓賣唔X出呢.....」引到身旁正做對手戲嘅Sammi笑到停唔到。

另一條出事NG片繼續同家輝有關，又係諗對白螺脷，抵死嘅係對白竟然係電視日播夜播、由佢做主角嗰個金融機構廣告。點解日播夜播都唔可以唔記得台辭0架？