林建名同細女林煒珽、趙哲妤、葉璇、胡渭康今日喺尖東出席《2017中國小姐大賽》新聞發佈會，對於有指林煒珽嘅外籍男友早前喺倫敦成功求婚，林煒珽由爸爸傍住接受訪問，佢話噚晚先返香港，問到男友點求婚？林煒珽話：「佢有跪地、有花、有酒、有鑽戒。（幾多卡？）我唔需要好大粒，靚就得啦，反而覺得越細越好，因為方便戴。」林建名就話：「我知，開心！」林煒珽指：「暫時未有計劃婚禮點搞，我只係答應咗，預計明年啦，不過都未知㗎，但應該會喺外地，去一個凍嘅地方。」

問到林建名滿唔滿意呢個未來女婿？佢笑笑口咁話：「未正式認識佢，暫時都可以。到時會唔會去外地出席囡囡嘅婚禮？戴夢夢代林建名答：「會，全力支持，因為廣州間公司有搞婚禮，可能林小姐係第一單生意。」

7年前曾參加中國小姐而入行嘅趙哲妤，佢指入行後人生經歷豐富咗，亦都做咗媽媽，佢回想當年參選時，因經常到大陸出席活動，所以學識普通話。