利物浦今晚歐聯E組作客莫斯科斯巴達，呢隊俄超上屆冠軍今季大幅滑落，11場聯賽得3勝排第8，陣中就冇乜具名氣嘅球星喇，不過教練卡里拉就有辦法搵到車路士領隊干地教路，幫手諗計應付紅軍，點解干地肯出手？

原因就係意大利籍嘅卡里拉，其實係干地踢祖雲達斯時期嘅隊友，只係冇咁出名，而且干地掛靴後做祖記同意大利國家隊主帥，都帶住卡里拉做副手，然後兩人分道揚鑣，卡里拉嚟到莫斯科斯巴達坐正，亦都順利贏到聯賽冠軍，兩人可謂多年兄弟。今次硬碰利物浦前，卡里拉當然搵干地過下料：「我當然有打畀佢，對話內容都唔止傾利物浦，仲有我哋啲私人野嘅！」

會踢咩戰術，卡里拉當然唔會講，不過都有少少暗示：「我哋要中和利物浦嘅特性，咁先可以發揮到我哋嘅長處。」換言之，睇嚟斯巴達今場應該會盡量用慢節奏黎減少犯錯。

上季干地兩場英超鬥高路普，成績雖然只係1和1負，不過輸嗰場仲係車仔踢緊4-2-3-1嘅時候，所以干地都有啲辦法架！