跑罷周末（22日）賽事後，隨著大摩及文家良分別憑「軍力勁」及「帝豪寶貝」叩開勝關，今季未齋練馬師，只餘下蔡約翰、蘇保羅及鄭俊偉三個倉口。

其中蘇廐跑了五次賽事只出馬五次，來緊周三（26日）夜馬也不過僅派谷草欠往績的「友誼之星」應戰，顯然蘇保羅自己並無開齋壓力，其實只要看看統計，也會發覺到每季一月至四月，才是蘇廐業績高峰期。

蔡約翰跑了五次馬只出八駒，不要說贏馬決心，甚至說連出馬意慾也欠奉，這亦與近季蔡廐部署模式的數據吻合。

所以周末賽前，先後有馬友問筆者兩匹蔡廐初出馬「請跟我來」同「邊個邊個」點睇，其實歷史已告訴他們不要賭拗氣錢。

就算這兩駒試閘有點睇頭，真跑又是不似預期！今趟又有朋友問周三「紅運戰士」會否成為蔡廐開齋馬，皆因初出谷草 1200 米全程外都近。都是同一溫馨提示，就算眼見條件唔錯，九月的蔡廐馬頂多跑八成，祝君好運！

講搶糊決心及迫切性，上述三位以長期處於護級邊緣的鄭俊偉最高。周三五班1800米鄭廐雙龍出海，「荷蘭風車」及「為善聚樂」季內均曾出賽熱身並能跑入三甲。

尤其「為善聚樂」剛戰跑同程全程被頂在外欄仍能入Q，鄭俊偉擺出這個贏馬「雙保險」，今期可望開齋，另外出戰五班1000米的「金剛秀」，過往曾交四班頭馬表現指數勝出同程，亦不可睇少。