香港人過去十幾年按摩成癮，令珠三角骨場、足浴店遍地開花，估唔到風水輪流轉，喺特區政府打造中藥港、鮮花港、教育樞紐、物流平台夢碎之後，終於痛定思痛將香港經濟產業轉型升呢，投資推廣署傲然宣佈，成功引入來自上海嘅足浴店悠庭保健會所DragonflyFootSpa在港開分店，按摩之都，就是香港！

試水溫性質

呢間足浴店03年在上海起家，家陣在杜拜、上海、北京、蘇州、杭州等地共有17間分店，噚日形容張新店位於灣仔世紀香港酒店，老闆任佐治話，今次落戶香港屬試水溫性質，好似將腳趾浸泡喺香港水域之中，暫時只提供足療服務，稍後先計劃如何大展拳腳。

按出個未來

香港人在珠三角浸腳無數，唔知內地大腕浸香港水有乜感覺？只怕區區一個維多利亞港，唔夠海派豪客浸淫，任佐治坦言，衝出上海目標其實係廣東市場，選擇香港做基地，係因為來往澳門及廣東交通方便，而且語言相通，日後可以有效管理喺澳門及廣東分店擴充計劃。
內地足浴店投資香港，可以預計日後需要大量按摩專才，現時僱員再培訓局提供嘅按摩證書課程，恐怕不能提供足夠技師，為免輸入外勞搶奪本地勞工飯碗，政府應立即增加培訓學額，長遠最好將按摩、足浴納入新高中課程，大學加開按摩學系，主修人體按摩、足部穴位，副修中醫中藥，按出個未來。
mailto:[email protected]