有一個不知有冇代表性嘅關注組或志願組織，做咗一個貧窮兒童學習調查，指貧童家居斗室─冇書枱讀書做功課，影響學習降低學習動機，又因為屋企太細小，不敢邀請同學返屋企，心理可能有負擔。
咁點樣解決呢？志願性組織永遠只有一個方案，就係希望政府正視扶貧問題，伸出援手。但點樣幫忙法先至可以解決晒所有冇書枱嘅問題？無人有答案。呢類調查只係為調查而調查，其實冇乜意思。左丁山諗吓自己少年時候讀書，幾時先至有一張書枱？答案係由小一到大學畢業，屋企都冇一張書枱，因家住板間房及冷巷床位，靠可摺埋嘅小飯枱做功課；由細到大都冇請過同學返屋企，有冇影響到學習呀？總會有嘅，咪諗辦法搞掂囉，現在有社區會堂、有街坊溫習室、有更多公共圖書館，比左丁山讀中小學時代好得多，真係要讀書嘅窮學生，人窮志不窮的話，冇嘢可以阻止到佢哋讀書，千祈唔好記住一啲好心社工之言，樣樣埋怨社會不公、政府唔理會呀。左丁山嘅老婆表弟幼時在橫頭磡幫父親睇街邊攤檔，坐在街邊紙皮箱上讀書做功課，考升中試派入皇仁，跟住由皇仁入港大讀工程，做咗工程師。街頭嘈吵生活似乎從來冇影響到佢嘅讀書情緒。雖然街邊學生未必個個可以如此，但當今之社工社運組織實在不宜動輒將一啲社會問題推晒俾政府，間接鼓勵清貧學童做「伸手派」。小時候唔願讀書，大個咗難道就去申請綜援？
終審法院法官以五票對零票，推翻特區政府之申領綜援人士須住滿香港七年之規定，指2004年之規定違反基本法，新移民只要來港一年，就可申領綜援。終審就是終審，不可推翻，但此判決帶有美國政壇嘅liberals（自由派）色彩，將來有關民生之訴訟案件，特區政府恐怕幾難贏得官司噃。因司法獨立，不能動搖，特區政府以後唯有多撥款作福利支出，可能因此而犧牲其他支出，例如教育。學界已有消息傳出，之前因為大學三改四，多撥款予八間大學，梁振英政府認為大學經費已經夠多，有意「壓一壓」，以後幾年大學申請撥款起樓（例如宿舍），未必咁易批准，前朝所講之教育產業，梁振英翻面不認，搞甚麼Education Hub喎，算吧啦！