1984年1月18日開業的太子鳳城酒家，營業至本月31日結業，消息傳出今日酒家大排長龍，周末訂座更全滿。已屆82歲的老闆譚國景（師叔）表示，由於年事已高，想把握與家人聚天倫的時光，決定趁年尾提早解除租約結束營業。有長年光顧的顧客表示，在這裏飲茶最重要有人情味，「（結業）梗係唔捨得啦！啲仔飲到孫都咁大啦！點會捨得吖？」據了解，業主正對外放租，月租近30萬。

鳳城酒家位於示威頻繁的旺角警署對面，師叔坦言半年來衝突對生意有影響，最差的兩個月生意大跌六成，曾經試過一晚只有一檯客，又有一晚遇上示威衝突，客人匆匆來，鳳城匆匆上菜，大家匆匆食完快步離開，「我哋都覺得唔好意思。」現時生意稍稍回穩，但未完全恢復，他不認為示威導致執笠，「個個都唔想㗎，做生意都係咁啦」，直言開業幾十年，「有咩風風雨雨未見過」，純粹因為私人原因退下來。「做呢行早出晚歸，自己都做夠囉，都係時候退落嚟。」

師叔祖籍順德，是1950年代銅鑼灣鳳城酒家創辦人馮滿的徒弟，當年因為馮擅長順德大良鳳城菜式，故將酒家命名鳳城。譚國景17歲入廚房，上有師兄，人家叫他師叔，一叫便幾十年。他於1980年代前後與兄長集資在北角及旺角開鳳城酒家，師叔形容這裡的業主好人，「如果唔係業主好人，我哋都做唔得咁耐」，不過解決了租約問題，人手短缺仍然棘手，難找接班人，師叔又不想賣招牌，只有結業，之後與飲食集團無關的鳳城酒家，尚餘北角店。

酒家多名員工與師叔是老主僱，跟隨師叔30多年，他惦記住員工，「做咗咁耐36年，相識咗一班好客，同埋有一班好拍檔」，經理敏姐和姜先生都跟隨師叔30多年，直指「冇人會捨得（結業）」，師叔總是厚待員工，即使生意陷低潮仍不減花紅，酒樓還留影不少，員工趁最後機會揀相留念，姜生坦言青年做到如今60多歲，也是時候退休。

老顧客、舊街坊懷念鳳城的傳統點心和小菜，葵涌專程來光顧的霍氏夫婦喜歡這裏的上湯粉果、豬膶燒賣，形容老式點心買少見少，鳳城不做非常可惜，「第二間又唔係咁嘅感覺」。

更多顧客懷念這裏的人和事。旺角街坊吳生吳太每周光顧兩三次，同樣大讚這裡的上湯粉果、生腸、乳豬、炒飯，是自家廚房出品，不同於集團式味道，水準保持至今，師叔與伙計總是親於家人，又常與食客傾偈，夫婦二人在電梯踫到員工，如再遇老朋友，「今日飲茶突然聽到話唔做，個心唔係幾舒服，好唔捨得」。

譚生譚太自開業來飲茶食飯，被師叔講笑形容為米飯班主，譚生大嘆想老細不退休也難，譚太認為這裏飲茶最重要有人情味，「（結業）梗係唔捨得啦！啲仔飲到孫都咁大啦！點會捨得吖？（師叔：有晒感情㗎呢度。）第日要去北角啦，都係掛住老細，但老細要為自己開心吓。」

-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇
-----------------------------
無懼警暴 學懂自救
《抗暴之戰●法例須知》讀果 上架
-----------------------------
【撐學生】
召集有心人 撐學生全年睇《蘋果》
立即按此