夏天嚟到，又係出海嘅季節。旅發局主席兼自由黨榮譽主席田少今年應該特別興奮，因為佢09年以海嘯價約9,000萬元買入最新款遊艇，等咗兩年，望穿秋水，艘船終於大致完成，田少同太太噚晚一齊出發去睇吓艘新船，準備稍後收貨下水。

可按買家要求豪裝

田少新遊艇係名廠Sunseeker嘅最新型號Predator115，全長過百呎，闊42呎，可以按買家要求加裝各式豪華設備，總統級套房、衣帽間，GPS導航、衞星電視通訊裝置應有盡有，又可配備水上電單車，只要船主落柯打，要乜可以有乜，想幾豪，有幾豪，可以話係富豪海洋行宮。田少家艘遊艇「ManhattanExpress」長80呎，由於船艙只有三間房，田少一家人帶埋幾個孫出海，艘船就唔夠地方用，因此要換新船。

舊遊艇放售都值錢

田少噚晚上機前同八方講，此行首站係去蒙地卡羅睇一級方程式賽車，逗留幾日，感受完刺激嘅速度感，下星期就轉飛英國，去船廠睇吓自己艘新遊艇。田少話新船搞得七七八八，稍後正式交貨時要搵專家驗收，而佢去船廠只係一日時間，之後就同太太在英國度假。
新船下水在即，據講田少想叫船廠送到法國交貨，因為佢今年或者同家人去地中海坐新船遊船河，亦唔排除直接運返香港，舉行下水禮。呢艘新船連007占士邦都用，集豪華與功能於一身，本來今年初交貨，但可能船廠生意好，要押後至年中，但總算趕得及今年夏天出海。
花近億元買超級遊艇，泊位連船員每月使費以十萬元計，數口精明嘅田少落定新船後，就放售「ManhattanExpress」，呢架船係意大利豪華遊艇品牌RIVA出品，大約10年前買都要成千萬元，同級遊艇家陣分分鐘半億元先有交易，雖然田少艘船嘅船齡達10年，但因為二手遊艇有市場，據稱轉手都好值錢。
mailto:[email protected]

SunseekerPredator115簡介

‧全長115呎、42呎闊
‧最高時速20海里
‧船艙可間五間房
‧可載10名乘客、5名船員
‧售價約9,000萬元
資料來源：《蘋果》資料室