【八方相當年】八級鋼琴高手盧俊宇 籐條練耐力完勝「何已完」
蘋果日報 2019/12/10 00:04
八方相當年盧俊宇
何君堯口中「死𡃁仔」，果然真係「未死過」，區選無懼白色惡勢力，喺屯門樂翠高調挑機，用3,839票、約58.9%得票率同市民齊歡唱「何已完」。「有諗過佢（何）乞人憎，但冇諗過佢咁恐怖。」勝選嘅民主黨盧俊宇（Cary）因為傘運被撻着，覺得自己可以為香港承擔更多，未全面政治覺醒前嘅佢，最多年年去六四集會，但無可否認中學時代已有極強戰鬥力——八級鋼琴高手，經常喺校際比賽掃低對手。
「其實初初都係俾阿媽氹，覺得好似幾威幾叻咁，唔算好鍾意彈琴㗎。」37歲嘅Cary，小學一年級已經學琴，最記得學完幾個月後要考琴，「唔肯練，畀阿媽用籐條打到叫救命。」佢笑言阿媽都「虎虎地」，由細到大喺「籐條」鍛煉中成長，唔知係咪因此練成同「何已完」硬碰嘅耐力？但至少佢呢一身鋼琴功力，令佢喺唔少校際音樂節脫穎而出。
Cary中學讀保良局百周年李兆忠紀念中學，之後去咗中大讀經濟系，自言對政治唔算好熱衷，03年首次跟同學去六四晚會，「嗰晚好震撼，喊得好犀利……覺得自己好無知，其實係應該關心多啲」，之後六四晚會幾乎年年去。05年畢業後喺銀行界任職，直至傘運嚟個當頭棒喝：「有日見有啲中大師弟妹罷課去參加，心諗：『我仲去返工？』」結果當日請假去支援，逢周六喺金鐘佔區過夜，「嗰時覺得係咪應該承擔更多，唔只食花生？」
2015年就喺家住嘅兆康出發，為民主黨陳樹英（阿Tree）區選助選。阿Tree最後敗陣，知Cary有興趣從政，2018年邀請佢入民主黨，正式踏上打何妖之路。由見證對方叫自己「跟佢學吓嘢」嘅得戚樣，到11.25無眼睇打敗仗嘅落泊相，Cary至少喺「何已完」身上學到，謙卑嘅重要性。
身穿Line公仔tee，擺埋V字pose，盡顯年輕青蔥味。盧俊宇提供相片
屯門兆康長大的盧俊宇，自細已是四眼仔。盧俊宇提供相片
盧俊宇（右）有個小他四歲的弟弟，笑稱媽媽（左）管教好嚴格。盧俊宇提供相片
中四時為音樂會任鋼琴師，首次接觸《孤星淚》名曲《Do You Hear the People Sing》。盧俊宇提供相片
初中時已參加各式鋼琴比賽。盧俊宇提供相片
大學二年級時做組爸，盧俊宇跟同學一齊染髮，人生首試「飛仔look」。盧俊宇提供相片
2015年為「師父」陳樹英區選助選，3年後加入民主黨，並在今屆親自披甲。盧俊宇提供相片
鋼琴造詣達八級，經常在校際比賽獲獎。盧俊宇提供相片
中大經濟系畢業，父母到場見證。盧俊宇提供相片