日本樂壇天后安室奈美惠展開為期半年嘅巡迴演唱會「LIVEGENIC2015-2016」，明年3月26日就會再次唱到香港，據知為咗原汁原味把舞台搬進亞洲博覽館，今次單是運送器材嘅貨櫃已超出20個之多，屆時近百名日本製作團隊會隨團來港，而安室歌迷會也會辦旅行團到港撐場，規模比兩年前有過之而無不及。安室今次香港個唱共分6種票價，由最平680港元到最貴嘅1,680不等，1月8日喺香港公開發售，而Citibank信用卡客戶已可以率先預訂門券。

安室今年舉行嘅全日本巡迴騷，橫跨至明年2月共開足44場，預計約40萬人次捧場，3月起更會緊接到台灣及香港演出，香港一站已鐵定3月26日假亞洲博覽館進行。安室今日假福岡開騷，係佢今年最後一場演唱會，佢會休息至下月中嘅新潟站繼續開唱。

其實安室於亞洲各地也有不少星級歌迷，人稱「蒼老師」嘅日本性感女神蒼井空，日前又再抽空撐偶像，蒼老師表示：「來到睇安室的Live！今次已是這個巡唱的第3場，過年後要繼續睇，或者會去海外捧場，真的很可愛！」蒼老師連睇三場似乎仍未夠喉，計畫明年3月到香港或台灣支持偶像。