在此大是大非的時刻，還在股票專欄講港股，一來無人關心，二來也無心情寫。不過，無論戰友將來死守又好、移民又好，有一件事你想避也避不了，就是資產配置，即係你嚿錢要擺喺邊先相對安全，今次先講吓home bias問題。

無論散戶抑或基金經理，炒股票多少總有home bias (本土偏好)，即不自覺地將大部份資金投放在自己處身的市場。你可能會話，要買梗係買自己熟悉的公司，隔山買牛有乜好？咁我會反問你：你上fb、IG多定wechat多？你確定自己真係好熟騰訊（700）？歸根咎柢，大部份人只買港股的原因，不外乎兩個：一、怕麻煩，轉錢又要畀手續費；二、懶研究，香港少人畀美股即食貼士，自己研又無時間，結果都係買港股就算。

中金最近報告顯示，港股2,400間公司，中資只佔三分一，但市值就佔港股三分二，大市值、交投旺的大多是中資股，但你對國策又有幾熟？呢兩年買教育股就知，人治的東西，死咗都唔知咩事。反觀Beyond Meat家陣香港周圍有得食，要試絕不困難，但佢上市個半月升5倍你又知唔知？再舉幾個例子：不少公司開會用Zoom、周末放假去Disneyland、飲可樂睇Netflix，均是摸得到、成日用的東西，要明白業務模式不難。篇幅關係，下期再分享魏力初學美股的經驗。

筆者為證監會持牌人，未持有上述股份權益。

魏力
www.facebook.com/2012jason
----------------------------
【新聞有價】6月17日起 繼續撐蘋果
http://bit.ly/2IJ24ZR