107歲嘅六叔邵逸夫安祥咁喺屋企離開人間，雖則話係笑喪，傷感仍難免。

勝曉嵐以前跑前線嘅時候，每年都要去九龍香格里拉會一會六叔六嬸（即係採訪TVB個AGM），由仲係佢老人家發表主席講話到唔發表講話，次次都要大大聲邊行邊問阿sir問題，而次次六嬸同幾個阿姐都會擋晒，記得在下最後去嗰次，六叔又係眼仔碌碌笑笑口望住幾個頗嬌俏嘅女記者，但好似真係講唔到嘢，而六嬸就好快手「的」走六叔，在下出到冧六嬸讚佢條絲巾好靚都無用……而家諗起，幾好笑，又幾唏噓。

點解勝曉嵐嗰陣咁enjoy去TVB嘅股東會？皆因對六叔六嬸呢一pair極有好奇心，先講六叔，奀奀瘦瘦嘅佢，完全打破在下心目中「巨人」應該係強而有力呢個一廂情願嘅諗法，影視大亨嘅地位至今無人能取代，至於六嬸，試想一吓六叔一生見盡人間美女，六嬸都能夠令六叔拜到佢石榴裙下，更厲害！呢一pair，簡直係男女界嘅典範！

Bytheway，昨日雖然鋪天蓋地都係六叔仙遊嘅新聞，但勝曉嵐都睇到TVB靜靜雞宣佈停止租用6個發射站畀中移動持有流動電視牌照嘅子公司，以6個月通知期計，即係到7月6日為止，咁樣等如封殺諗住7月1日開台嘅香港電視（1137）！TVB小學雞啄住唔放王維基係可以理解，但偏要揀噚日公佈，TVB頓時變成一隻小家嘅小學雞，毫無大將之風，佢嘅新主真係好打有限！