國際足協（FIFA）早前以現行互射12碼制度對「射後」一方唔公平為由，研究試行「ABBA」方式，即係如果A隊先射，之後就到B隊連射兩球，再到番A隊連射兩球，如此類推……喺歐洲足協（UEFA）推動下，周四嘅U17女子歐國盃4強就成為首場「白老鼠」正式比賽，已經爆出驚人效果！

喺呢場德國女足U17對挪威女足U17嘅賽事，雙方法定80分鐘踢成1:1，造就首場「ABBA」制互射12碼好戲產生！德國隊嘅懷達（Verena Wieder）射先俾挪威門將救出，其後挪威連射兩球，比積迪（Thea Bjelde）又俾德國門將撲出，直至辛迪（Malin Sunde）第3球先射入，但最估你唔到係事情峰迴路轉，德國連射兩球分別被救出同中柱，頭3輪全失下竟然能夠反勝晉級，皆因雙方要鬥足6輪，12發極刑夾埋射失7球，當中有6球係俾雙方門將救到，唔通呢個就係「ABBA」制嘅副作用？德國女足U17晉級決賽，周日將會同西班牙女足U17爭冠。