世界盃今晚就正式開鑼啦！食神韜韜都講過打邊爐最緊要係個煲，計我話睇世界盃最緊要係零食同啤酒！所以今次蘋地試食小隊又再次出動，為大家搜羅咗8款即食炸魚皮，睇吓邊款最啱睇波時食！

今次試食嘅炸魚皮主要有兩種口味，鹹蛋黃味同埋原味。當中鹹蛋黃味炸魚皮嘅牌子包括祖味、華園、香港仔、Irvins仲有金鴨，而原味炸魚皮嘅牌子就有優之良品、祖味同埋四海魚蛋。

事不宜遲，試食開始！

---------------------------

​祖味－黃金脆魚皮 蒜香咸蛋味 

$30 @ 士多Ztore

​佢主打係蒜香鹹蛋味，蒜味同鹹蛋味平均分佈喺成塊魚皮，非常易入口，用嚟配啤酒係唔錯選擇。

​平均分數：7/10

​---------------------------​​

​華園－鹹蛋黃炸魚皮

$ 48 @  百佳

​一開包裝就睇到有鹹蛋色澤，魚皮偏黃色，好重鹹蛋味，每塊魚皮上都有少少油份，雖然口感唔算好脆，但味道較濃，令人食唔停口。

​平均分數：8.5/10

​---------------------------​​​

​香港仔－金沙鹹蛋脆魚皮

$ 35 @  百佳

​呢款炸魚皮嘅鹹蛋味同魚味都唔太突出，魚皮比較乾身，又唔係太脆。

​平均分數：6/10

​---------------------------​​​​

​新加坡品牌IRVINS Salted Egg－鹹蛋魚皮

$ 55 @  IRVINS Salted Egg Pop-up Store

​一打開包裝就有好重鹹蛋味，食落口之後，佢會喺嘴入面完全平均咁咬碎，口感超正，令人一試難忘！入面仲有用蔥調味，味道絕對有昇華！

​平均分數：9/10

​---------------------------​​

​金鴨－黃金鹹蛋炸魚皮

$ 55 @ 全線7-11

​好重鹹蛋味道，佢嘅特色係帶甜同時又帶辣，所以用嚟配酒絕對係一流。不過如果唔係太食得辣嘅朋友記住要注意！

​平均分數：8.5/10

​​---------------------------​​

​優之良品－磯燒魚皮

$ 25/2包 @ ​優之良品

​口感幾脆，味道比較淡，較適合打邊爐時食。

​平均分數：6/10

​---------------------------​​​

​祖味－原味脆魚皮

$16 @ 士多Ztore

​原味味道比較淡，不過魚味都算重，似係一般喺魚蛋粉麵鋪食嘅炸魚皮。

​平均分數：7/10

​---------------------------​​​

​四海魚蛋－魚之皮脆

$11.9 @ 百佳

​魚皮係咁多款之中最厚身，但魚味強度一般，有少少腥但係唔反感，口感取勝。

​平均分數：7.5/10

小編建議大家睇波時可以試下食​鹹蛋味嘅炸魚皮，因為味道較重所以夾埋啤酒就一流！

發掘更多身邊的小城故事，請LIKE 蘋地Facebook Page，並設定為「搶先看」： https://fb.com/appledailyland