「巴基之星」喺精英碟出閘後拒絕展步，捧場嘅馬迷開閘冇耐就搣得飛，真係無癮。唔少人覺得「巴基之星」有性格，先前幾次都輸俾莫雷拉嘅座騎，今次就玩唔合作，即使雷神頭馬同獎金屢破紀錄又點，都俾隻馬搞到非常冇面兼冇符。

雷神被「巴基之星」考起，可能個心都㷫㷫哋，明知冇爭勝機會，仍然連環重鞭砌隻馬，堅持要逼到隻馬跑過終點。雷神事後以教馬作解釋，話唔想隻馬養成惡習，最終只係俾競賽小組罰咗一萬蚊。雷神覺得打到隻馬飛起係教馬，俾人感覺似發洩多過教馬，馬主亦未必接受咁樣教馬，有權向馬會投訴。

雷神喺非賽事進行途中，眾目睽睽下不斷鞭打隻馬，老實真係講唔通，馬會對騎師用鞭尺度有指引，唔係騎師鍾意點就點，就算冠軍騎師都唔可以亂咁打隻馬。要教馬的話，應該返馬房慢慢教，何況「巴基之星」俾雷神打得咁甘，隨時反而累咗隻馬，點知會唔會留低陰影，以後更加唔肯跑。

近排風頭火勢，已經好多人關注馬匹跑跛腳人道毀滅，有虐待動物之嫌。咁多人睇住莫雷拉狂抽「巴基之星」，賽後獸醫已經驗到隻馬周身鞭痕，若有人走去愛護動物協會投訴，話雷神虐待動物，指控都好大機會成立。其實競賽小組今次對莫雷拉罰得太輕手，罰款加重之餘更加要嚴厲譴責佢，唔係大騎師就可以冇規冇矩亂咁嚟。

阿Joe