【落飛黨輸大錢】巴度爆冷Win!苗禮德報答馬主18年支持
苗禮德巴度再石磨藍
所謂有心唔怕遲,法國騎師巴度上星期二(5日)26歲牛一,獲索爆女友Eva在社交平台送上甜到漏之愛的宣言,終於等到今晚(13日)巴度在谷中贏馬,作為對女友的最佳回應,兼替自己補送一份最佳禮物賀壽。
巴度這晚於第二場四班1200米爆冷贏苗禮德馬房「再石磨藍」,亦係佢今季重臨客串以來首度為苗廐建功,而該駒久休半年復出,爆冷打響新季出賽頭炮,單Win及組合獨贏A3分別派201及36.5元。
六歲馬「再石磨藍」於今年8月底試閘後兩個鼻孔流血,直到11月上旬至通過馬會規定的檢驗及測試,為恢復參賽鋪路。呢晚賽前巴度從冇操過亦未騎過此駒上陣,惟人馬在陣上卻表現合拍,沿途居中留住跑,末段一加速即從中叠一攻而破,贏亞軍9.4倍啡燈馬「八太子」1.75馬位清脆俐落,搞到落飛黨輸掉130萬獨贏注碼。巴度季內在港累積三Win全於谷草夜賽錄得,田草及泥地均未開齋。
苗禮德表示「再石磨藍」經悉心治理下,現在健康已受到控制,近期晨操走勢非常好,此馬過往田草賽績比較可靠,不過牠在四班確實有利,因此有一定信心。
苗禮德表示非常高興交出頭馬,因為馬主劉志芹由以往「牛仔布」起,已經支持他18年,是一位相當長情和忠實的馬主。
第二場前四名冷熱互見,當中「八太子」、「航天勇將」及「精算八方」依次跑獲亞至殿軍,四重彩派八萬四千幾。