剛周日華將何澤堯騎告東尼隻三歲馬「加州再豫」成功喺1600米取得連捷，但何澤堯那場大打茅波，直路因「加州再豫」塞在內欄，佢夾硬向外抽出，大力撞開左邊之「華麗傳奇」，以撬出空位，令「華麗傳奇」失去平衡，結果何澤堯被罰停賽兩期，另加罰款二萬五千元，成為圈中人嘅話題。
受害者「華麗傳奇」騎師羅理雅接受訪問時指出，如果冇呢單事故發生，「華麗傳奇」好有機會跑入三甲，雖然座騎受到嚴重干擾之下，最終只得第五名，但羅理雅認為跑馬講求際遇，有時碰撞唔能夠完全避免，因此唔會怪責同特別埋怨何澤堯。