Miki餐廳有MickeyMouse？由前「餅女」歌手Miki楊愛瑾同親友合資開設嘅高級西班牙餐廳RicoBistro，日前竟然有老鼠出沒，呢隻不速之鼠同卡通老鼠一樣鍾意親近人，仲竟然大膽到爬上客人身上！據食客潘太向八方形容：「隻老鼠爬喺我老公手臂上面，有手掌咁大隻，屁股大過乒乓波！好恐怖呀！」
RicoBistro兩年前喺港灣道灣景中心一樓開業，晚膳消費平均每人成200蚊，餐廳負責人陳小姐解釋：「我覺得佢哋生安白造，又唔見隔籬枱客話見到有老鼠？」食環署就話收到投訴後去過餐廳巡查，發現唔到老鼠。潘太聽完之後得啖笑：「隻老鼠梗係走咗啦！如果有條屍喺度，我嗰晚仲唔報警咩！」