前兩日睇報紙，見到一則幾令人惋惜嘅新聞，一位退休銀行職員攞養老金炒股都不特止，仲走去借孖展炒股，結果蝕咗幾十萬，最後搞到要跳樓輕生。
敏妮爸爸一向唔炒股，但最近幾次抽新股都有錢賺，所以出咗部股票機，學人做散戶，佢後生嗰陣都鍾意過大海賭兩手，但好有節制，每次諗定帶幾錢過去，輸晒唔會磨爛蓆，𠵱家炒股大注啲都會問吓屋企人意見，所以敏妮好放心。

敏妮好贊成老人家炒股過日辰，但細細注好喇，當鍛煉腦筋，贏咗當幫補生活費，千祈唔好畀佢蝕入肉。呢位退休人士玩到孖展咁大，真係過咗火位，所謂貪勝不知輸，敏妮都有剪低呢單新聞畀爸爸做警惕。敏妮媽咪歸咎孖展累人，其實孖展本身並冇問題，只係投資者點樣運用同識唔識計數。
孖展嘅特點係以小博大，高回報自然要承擔高風險，有啲股票行甚至畀投資者借孖展炒窩輪。不過敏妮認為，孖展本身已經咁高風險，窩輪本身亦已經有槓桿效應，借孖展炒窩輪即係喺鋼線上面踩單輪車。唔使睇乜，淨係睇一向進取嘅永隆銀行咁，畀投資者借孖展炒輪，但借得一成，即係買10萬蚊，自己要出9萬。
所以敏妮唔贊成借孖展炒細價股，出小小本錢買嗰啲可以左右到大市方向嘅藍籌股仲好，跟手沽番張期指做對沖，個市升，你用孖展買嘅藍籌股自然有賺；雖然期指要輸，但只要個市唔係急升到你平唔切倉，輸極有限。相反，個市跌，期指贏嗰啲可以幫補孖展輸嘅。
其實講到尾都係講緊點樣做好風險管理，要控制風險，最緊要係選擇可以負擔嘅孖展槓桿比率，喺滙豐度借孖展，借貸比率最高做到六成，即係買10萬蚊股票，自己要攞4萬蚊出嚟。

當然有啲股票行畀你好進取咁炒，以大福證券為例，借貸比率可以做到75%，即係買100蚊股票，自己只係畀25蚊，輸晒要你填番筆數75蚊就話易，但如果係75萬，甚至750萬，你就出事，仲未計利息噃。
所以借孖展唔好貪槓桿比率高，最緊要睇自己嘅負擔能力。
儒家思想──
中庸之道，凡事千祈唔好去得咁盡。