【79歲牛一】吳嘉龍努力造孫賀父生日 恬妞為王菀之願收半價
吳耀漢王菀之恬妞如珠如寶林敏驄
恬妞、王菀之(Ivana)、吳耀漢等主演,林敏驄執導賀歲片《如珠如寶》,噚晚喺旺角舉行煞科宴,出席演員還包括莊思敏、莊端兒、吳嘉龍、泰迪羅賓、邵音音及顧定軒等。
呢個月27係吳耀漢嘅79歲生日,劇組送上蛋糕慶祝,吳耀漢笑言生日願望係唔好太早死,兒子吳嘉龍表示會請爹哋食飯,佢話:「搵班未死嘅朋友出嚟慶祝。」問到會否送個孫畀爸爸做禮物?吳嘉龍話:「試下要努力啲。」吳耀漢表示已有兩個外孫,分別1歲及22歲,吳耀漢話:「3個女都好懶。」吳嘉龍指家姐們要努力啲,佢自己仲有好多時間。
林敏驄指有份演出嘅林雪睇完戲之後,大讚吳耀漢係最勁嘅喜劇演員,佢仲話如果票房大賣嘅話,會帶演員環遊世界,票房收幾多都去,不過要度期先。
王菀之飾演老人院看護,主力照顧恬妞,Ivana大讚恬妞係最靚院友,Ivana話:「佢人靚、幽默又可愛,同佢合作好開心。」恬妞表示與王菀之合作係緣份,二人成為忘年之交,恬妞說:「我同佢乜都講,佢係好慢熱,衝破佢嘅防線就乜都講,佢演技好好,可以拍任何片種,下次如果有佢嘅戲,我願意收半價片酬。」
精選娛聞,喺晒《娛果》
http://fb.com/appledailyent