【拜拜《頭條》】吳志森抗拒借殼還魂：喺公營機構意義重大不同
蘋果日報 2020/06/19 21:58
頭條新聞吳志森曾志豪和你傾
《頭條新聞》播完後，3位主持開FB LIVE，吳志森覺得在公營機構延續諷刺時弊才有意義，代表政府、社會仍可包容其他聲音。
港台節目《頭條新聞》抵不住強權進逼，早前已宣佈播完今晚一集後，將會暫停製作。在節目尾聲，3位主持吳志森、曾志豪、羅啟生以過往扮過的角色出現。雖然各個角色輪流出現，但同樣地對未來抱有疑問，例如唐僧感嘆：「以前取西經係合法，以後取西經可能當係勾結西方。」偽經絡出場就感慨：「原來自己遇到好皇帝，才可以保住人頭……等皇上記得我又唔再嬲，我咪返嚟囉。」徐副官又不捨角色，說：「可以理直氣壯咁擦鞋好唔不容易，但我都要走喇，因為新一代的擦鞋功力遠超自己。」
鏡頭後三位主持人在節目完結後，即在《頭條新聞》FB開LIVE和你傾。吳志森與曾志豪在LIVE中分享到，聽過人鬧節目維穩：「啲市民本來好嬲，諗住上街掟石，但睇完節目就好似為自己出咗啖氣，就唔使再上街啦！」
《頭條新聞》似乎沒有希望在港台延續，吳志森透露好多人聯絡，指可以協助《頭條新聞》在其他平台重生，但吳志森並不樂意，全因着重背後意義，他說：「喺主流媒體、公營廣播機構入面繼續做，嗰意義同喺其他網上平台出現好唔同。喺呢個平台，以呢個模式出式出現，係代表到政府、社會包容到呢種諷刺時弊、嬉笑怒罵，其他平台係可以繼續嬉笑怒罵，但意義係重大不同。」
曾志豪臨別前，自掏腰包買花送予拍檔及幕後同事，曾志豪與吳志森感激幕後多年來的努力：「節目唔係得我哋3個，幕後嘅力量好大，嗰節目先可以咁受歡迎、咁成功。後面有監製頂住好多壓力。如果唔係，個節目一早就冇咗。」
黎國輝（阿感）因為有節目緊接《頭條新聞》，他之後到後台送別，他今晚接受《蘋果》訪問時說：「知道佢哋要停播都好大感受，睇返佢哋31年前發表意見，甚至節目內容嘅片段，真係睇到有唔同轉變。聽到佢哋話講唔到『後會有期』，佢哋唔係個個係公司員工，唔一定返到嚟，令我有無限欷歔，真係時代終結嘅感覺，真心佩服佢哋去到最後一集，仍堅持自己風格，講出社會事件，膽量勇敢。」
阿感的節目《日常8點半》緊接在《頭條新聞》之後，有緣在後台為《頭條新聞》告別。
吳志森送花到控制台給節目監製，之後3人在樓梯作港姐式揮手講拜拜。