用人疲馬倦來形容目前狀況最合適不過，最冇癮係幾乎每個星期三都似同一批馬，熟口熟面。

而最難搞係馬匹演出可因檔位由包尾變第一，大多數更係人為影響馬匹演出，近期最矚目當然係「文藝學家」，若計上陣馬熟口熟面肯定非方廐馬莫屬，正因為跑得多減分自然多及快，去到季尾階段呢類馬不妨優先選擇。

禮拜三第五場「澤心星」今季71分起步，平均計一個月跑兩場左右，去到上仗落至50分飛到馬到一擊即中，贏完雖加七分，但現時57分與季初71分相比仍有一段距離，如此辛苦減分不相信一W即收！始終五歲馬仍在壯年唔相信退化得咁快，只要看過上場贏馬姿態就明白。

另一駒令人最不服氣係第二場「進綵」，由季初三班74分落到目前40分，唔相信冇得反彈！好明顯係馬房耐性驚人，但此系馬今季全線冇收穫，既減咁多分冇理由仲繼續等下去！