八月時正式結束跑手生涯嘅保特，雖然喺世界田徑錦標賽4x100接力賽嘅最後一戰，失足倒下遺憾告別，家陣個傷應該都未完全好返晒。不過，保特退休後已經成個人鬆晒，周圍遊山玩水，最近就同女友班妮特（Kasi Bennett）開船P，仲喺船上手舞足蹈。

班妮特上載咗船P少少片段上社交網站，除咗好自信咁影自己嘅身材，大露事業線，當然唔少得男友保特。保特喺架船上high到爆，一路唱歌一路跳，而片入面其中一個鏡頭，就影到架遊艇個名，叫「The Dominator（統治者）」，聽落都覺得霸氣。

上月曼聯對李斯特城場英超，保特亦親臨奧脫福為愛隊打氣，仲搵到費爵爺集郵，而九月初就飛去日本出席商業活動，仲去川崎前鋒探班，同一班球員喺訓練場猜波同合照。兩袖清風又多錢，梗係慢慢歎世界，想做乜就做乜，你同我都恨唔到㗎嘞！