【本報訊】福無重至，禍不單行。經歷了一場全球金融大海嘯，熱衷投機的香港人都成了驚弓之鳥。當東亞銀行擠提的消息昨日廣泛傳開後，不論是受過高等教育的專業人士，或游手好閒的退休阿伯，均立即丟下手上作業，一窩蜂擁去提款。沒有人理會傳言孰真孰假，有人駕着平治房車趕到銀行；有人則苦苦哀求銀行職員派給他一個籌。
小股民陳先生剛度過了一個「黑色星期」，先是辛苦掙來的10多萬元雷曼債券變作廢紙，心情尚未平復，昨日又接獲東亞擠提傳言，急得他要趕往提走僅餘的10萬元積蓄，「真係好黑仔，衰嘢一樣接住一樣。」接連傳出金融機構有財政危機，陳先生說以後不會再存款入銀行或購買股票、債券，「我已經對銀行、金融機構無晒信心。」這又代表了多少個你和我的心聲？

東亞銀行擠提謠言四起，有駕駛平治房車的有錢人同樣不甘存放在銀行的真金白銀或見財化水，親自接載外籍家庭女傭，趕到總行提款。看見人龍排到雪廠街，管不了是否禁區時間，也管不了是否會給警察抄牌，穿紅衣的男子立即跳下車廂；在發現自己遲來一步，東亞銀行職員已經截龍時，他一度哀求職員給他一個排最尾的機會。當他獲悉職員會派發優先籌號給遲來的客戶時，隨即打開車尾箱取出圓膠凳，叫家傭排隊輪候等派籌，然後自己驅車離去。

家住海怡半島的楊太聽聞東亞銀行擠提，擔心自己六位數字的存款血本無歸，急趕到香港仔分行提款，卻赫見大排長龍，猜想中區總行客戶可能較有見識，不會輕信傳言，於是改到中環。誰知趕到總行，眼前不少竟是上班族和OL。她剛好走到雪廠街龍尾排隊，東亞銀行職員即上前截龍，隨後有職員安排她先拿籌，表示今天再到銀行可獲優先處理。她取得八號好籌，「唔信東亞一晚冇晒錢，博一鋪等多一晚。」

準備北上消遣的張先生原想到東亞銀行提取四萬元，誰知到總行時看見大排長龍。經打聽後才知道有人傳言東亞被雷曼兄弟連累，銀行「好唔掂」。他半信半疑，抱着寧可信其有，不可信其無的心態，加入排隊行列。他說：「我由下午兩點排，足足排咗三粒鐘，自己都心大心細，原先諗住攞四萬銀，最後都係決定攞夠40萬，留番少少喺銀行。」

沙田廣場東亞分行存戶陳太表示：「其實幾日前我已經收到朋友嘅消息喇，話東亞響美國嘅業務出咗事，當時我冇放響心，今日諗住攞錢用所以嚟提款，點知冇幾耐背後排隊嘅人越來越多，仲塞晒響大堂，搞到我好耐都埋唔到位。總之我對香港銀行失去信心，真係好擔心雷曼事件唔知會影響到邊啲銀行，亦唔理解啲銀行投資啲乜嘢。」

吳女士在觀塘康寧道東亞分行排隊三個多小時，因現場人數一度多達1,500人，遠超出銀行人手所能負荷，銀行於是向未能提款的客戶派籌，安排今日取錢，吳女士得到一張「0001」頭籌。她說：「親戚話東亞有事，阿哥叫我嚟幫佢排隊，因為佢戶口有10萬蚊以上，超出存款保障上限，佢託我一定要攞番晒啲錢出嚟，轉去存入滙豐、恒生、渣打呢啲有信心嘅銀行。」不過，錢始終未到手，「聽（今）日可能又要再排一輪先攞到錢，不過無法啦，真係對銀行無信心，唔放心存錢喺度。」

在青衣青怡花園東亞分行輪候多時的客戶陳女士，聲淚俱下說：「我存喺東亞銀行嘅錢就唔多，只係幾萬蚊啫，但存響佢哋嘅保險箱就好多呀，成50萬蚊，有金勞、首飾、珠寶等，好擔心呀！我以前每年交嘅保險箱錢由600幾蚊加到𠵱家千幾蚊，以為安全喇，點知都唔穩陣，容乜易間銀行俾人封咗，放響保險箱嘅嘢攞唔番㗎！」