閻奕格噚晚喺旺角麥花臣場館舉行《To You With Love》香港音樂會，獲屋企人現身支持，陳欣健、林德信（Alex）及年僅13歲嘅泰國歌手Gail Sophicha做嘉賓，演唱會上閻奕格透露同林德信雖然只係第二次見面，但好開心能夠同台演出，林德信亦笑言：「自己都唔知點解會喺呢度。」

閻奕格又表示自己已經多年冇喺香港過聖誕，佢話明年將會繼《風雲》後，再喺香港演出音樂劇。閻奕格騷後接受訪問時對表現相當滿意：「直情係開心，加上有屋企人喺度，我哋成家人已經好多年冇喺香港過聖誕。」佢話嚟緊大除夕將會到泰國出席倒數活動，到時仲會同屋企人一齊去，順便旅行。

閻奕格笑言計埋綵排只係第二次見林德信：「多謝公司安排，我平時一見到男仔就會唔識講嘢同好尷尬，好彩Alex喺台上面會主動講嘢。」問道係咪畀林德信電暈？佢話：「Alex真係幾靚仔好有魅力，希望第時有機會再合作。」

精選娛聞，喺晒《娛果》
http://fb.com/appledailyent