一位女讀者Jo,應屆會考生竟然電郵一籤,要求左丁山解籤。千祈唔好當左丁山係解籤佬,只因你話係第二次會考,亦係最後一次會考,故此幫你一個小忙,以後下不為例,唔會再答。你為會考而去黃大仙求籤,得第八十四籤中籤:「滿腹奇才志未沖,鐵雞難舉意無容;張良指示身投漢,項羽烏江命自窮。」此乃韓信棄楚歸漢故事,韓信懷才不遇,雙手雙力,舉唔起一隻鐵雞,俾人笑到面黃。後遇張良,張良叫佢加入劉邦陣營,果然後來成為大將,大敗項羽,輔助劉邦做漢朝開國皇帝。照字面及故事解釋,Jo要遇上貴人開解先至掂,以現代語言講,你須碰上一位好老師指點、輔導,先至會出人頭地,淨係靠你自己苦讀,唔會好掂,換句話講,要有一位仁兄仁姐同你開竅,自然一理通百理明。籤文大意如此,千祈唔好太過掛在心頭,凡事要以平常心視之,切勿太緊張呀!