欖七兼職 啤妹時薪$100
昨日剛剛落幕的香港國際七人欖球賽(欖七),五千張門票一粒鐘沽清。能一票在手踩入大球場的固然型爆,但有一班後生仔女做啤酒妹賣場刊執波仔,能夠賺外快之餘,仲可以慳番千幾蚊一張的門票!
記者:蔡俊業
攝影:梁細權
■Sevens門票有價有市,5,000張門票售$1,250依然打個乞嗤賣晒,唔捨得大拿拿畀千幾蚊睇波?下年不妨考慮在會場內做兼職或當義工。
場內啤妹人多勢眾,青春滿分,走幾步隔幾秒便能碰上。驟眼看她們有如舊式廣東茶樓的點心姐姐,兩邊膊頭揹起托架直接叫賣,只是點心換成一Jug啤酒,紮辮的Gobe便是其中一位。她本身從事跟單文員,閒時收工後都會賣啤酒賺外快,「平時返兼職,如果返得足,一個月可以搵到萬幾蚊,喺呢度每日做六至八個鐘,一日可以賺到千幾二千蚊,而且難度只係一買同一賣嘅difference!我哋basic都有錢,時薪好似係$50!」條數係咁計:她和其他BeerGirls以$180向啤酒公司購買一Jug啤酒,然後以$190的價錢轉售街客,每賣出一Jug,即袋$10。入過場的人都知道,外國人飲啤酒如飲水,喪買喪飲下啤酒銷情自然好。
■從事文職的Gobe在Sevens場內做BeerGirl賺外快,「呢度可以同客人互動,做文職只係對住電腦。」
另一位啤妹Stephanie說,由周五下午兩點到受訪的六點為止,四小時已售出40Jug啤酒,成功淨袋$400大元,平均計時薪$100,為最低工資的三倍有多。但Stephanie直言介意「啤酒妹」三個字,影相亦只肯見頭不能見啤酒。Gobe說這份工好賺是好賺,但多與少還得看彩數,有時客人幫襯旁邊另一位而不幫襯自己,惟有勤力多走幾轉,揹起托架在球場內左穿右插,上落樓梯,「有時行到上去觀眾席都未必有人幫你買,六至八個鐘係咁行,揹得越耐就越攰,收工後真係攰好似到俾人打完咁。捱完三日之後,通常我哋呢班女仔都會去揼骨鬆一鬆!」
■Stephanie經職業中介應徵為嘉士伯BeerGirls。
■外國人鍾意邊睇Rugby邊將啤酒當水飲,BeerGirls生意自然好。
■近年Rugby西洋味漸淡,越來越多香港人到場飲酒睇波過Happyweekend!
有人不怕捱苦為賺錢,亦有學生來到大球場當義工增長見聞。人群中,除了一班綠衣BeerGirls之外,不難發現另一班身穿大會官方深藍色Tee的義工團隊。在大門入口右邊的場刊售賣處,便有四位義工一邊高舉場刊,一邊哼唱「OfficialProgramme」叫賣,他們都是來自IVE的學生。Kelvin是唯一男生,他說來到Sevens現場做義工是學校實習的一部份,所有同學必須參加,再經大會分派到不同崗位,「我同幾位同學就喺度負責賣場刊,有部份就會去做media嘅工作。」他說這次機會能夠讓他見識Sevens的現場氣氛,「原來班球迷真係好熱情,見到佢哋有時真係會興奮到除衫,又會悉心打扮,真實過喺電視機面前睇!」但更大得着其實是與外國人打牙骱,「就算香港係國際都會,自己平時都唔會點樣講英文,而睇呢項運動始終係外國人居多,所以講英文係做義工短期內嘅最大得着!」
同為IVE學生,主修康體文娛業務(LeisureStudies)的王同學及吳同學就經大會分派到入口中央舉牌叫賣場刊,王同學直言這裏靚女多外國人更多,「呢度真係一個增強英文嘅好地方。」旁邊的吳同學便指除了提升英文水平外,也為自己修讀的科目來一次真實參考,「可以學到一個國際盛事係點樣搞,點樣做人手安排。而我自己都覺得好大開眼界,因為都係第一次參加咁多人嘅活動,氣氛好好,下年有機會一定再嚟睇!」
■IVE王同學(左)及吳同學均說做Sevens義工大開眼界。
■Kelvin(右一)和三位同學在場刊銷售處高唱「OfficialProgramme~~~!」
■樹仁大學英文系Alice(左二)曾在東亞運接待韓國隊隊長Jun-ki,竟在Sevens再遇。
HKSevens作為全球最大型的七人欖球賽(最多參賽隊伍、最高獎金及最多得分),能夠有份參與統籌及支援的經驗非常難得。大會資料指出今年Sevens共有380位義工,另外還有32位BallBoys負責執波仔。不過原來所有義工都不設公開招募,而是從城大、教院、IVE及白英奇等七家院校的酒店管理及康體文娛業務學科招來的大專生,還有部份是有參加公開試體育科的中學學生方可以委派成為Sevens義工。至於32位BallBoys事前需要參加香港欖球總會為期一年的培訓課程,經挑選後再接受另一輪培訓,包括學習球例及比賽流程等,方能夠在大球場上執欖波,而且年齡必須介乎12至16歲。家長們想讓小朋友參與,不妨致電欖總查詢。
(電話:25048311)
■正門入口多了一幅大漫畫,點中球迷神經,惜未能成為景點。
■球場外圍勁多豆釘等攞簽名,二撇雞(右二)猛叫:「Argentina!」
■港隊打完比賽立即要離開,簽名時間無多,有機會簽到的女Fans自然四萬咁口!
Sevens一票難求,今勻記者憑採訪證「免費」入場,定必恨死親朋戚友!但實情根本一點也不筍,我與攝影師由進場開始便圍住大球場上上落落,又影相又拍短片,真係一場波都無睇過,慘!幸而,還是可以用耳朵感受現場超熱烈氣氛,可惜首天賽事場內居然沒有人發起玩人浪?!最後任務總算完成,突然有位西洋美少女叫我幫佢影相,做完好心我都攞咗部iPhone出嚟同佢合照,點知佢居然作狀錫埋嚟,仲要錫了幾次。朋友笑道:「你賺到啦!」哦,原來入場人士好多都係醉翁之意。