盧巧音(Candy)一連兩場嘅《RE:TURN演唱會》噚晚喺旺角麥花臣場館順利完成，Candy話知道Sammi應承做嘉賓之後，開心到心跳加速，完騷後Candy接受訪問，講到Sammi答應擔任嘉賓，佢話簡直令佢喜出望外：「第一場嘅嘉賓係周國賢，我希望兩場演出請一位前輩一位後輩，我覺得佢哋兩個係我心目中嘅人選，好多謝佢哋願意幫手。」Candy話因為老公蘇浩才嘅Kolor樂隊要喺外地演出，所以趕唔切返嚟一齊演出：「不過老公有幫手喺門口幫我賣Tee。」

講到自己近年愛上跑步，Candy話跑步令佢有人生目標：「做運動令我心情開心。」佢表示自己已經冇再受抑鬱症困擾，直言跑步運動對佢幫助好大。問到有無約埋老公一齊跑？佢話：「有時都會㗎，老公都會話咁浪漫呀，好啦。」今次兩場演出Candy直言唔夠喉：「但係因為無期加場，希望明年有機會再搵地方演出。」

更多娛聞，喺晒《娛果》
http://fb.com/appledailyent