經歷遇劫慘傷左手僅僅半年，姬維杜娃強勢歸來！周日WTA伯明翰網賽決賽，兩屆溫網冠軍姬維杜娃喺決賽落後一盤下反勝澳洲新星芭迪4:6、6:3、6:2，贏得職業生涯第20個WTA錦標，亦係佢自去年12月遭匪徒入屋行劫兼刺傷握拍左手後首個冠軍！姬維賽後表示：「呢個冠軍係獻畀我嘅團隊同球迷，多謝你哋陪伴我走過難關。我哋本來連能否復出都唔知，何況能夠贏冠軍，所以呢個係份外難忘嘅時刻。」

至於同日ATP哈雷網賽決賽，35歲瑞士球手費達拿喺「老嫩對決」面對20歲德國新星施華利夫，展現草地王者本色，輕鬆贏直落兩盤6:1、6:3，第9次贏得呢項賽事冠軍！英國皇后會盃決賽方面，西班牙球手盧比斯喺挽救一個錦標分下，以4:6、7:6、7:6反勝克羅地亞嘅施歷稱王。