鄭秀文（Sammi）同許志安呢對舊情人雖然已經分手多時，不過兩個依然經常成為傳媒焦點，而Sammi經常都話同安仔再見亦是朋友，大家友情不變喎！
但係前晚Sammi、安仔仲有何韻詩到九龍灣為東亞華星音樂會綵排，Sammi對安仔態度就忽冷忽熱，反而對曾經傳過斷背情嘅阿詩就相當熱情，唔通係因為Sammi嬲咗安仔之前話佢係怪人，所以搞成咁？
馮仁昭當晚見Sammi同安仔合照時完全冇交流，綵排唱歌時Sammi更幾乎全程用背脊向住安仔，好似當佢透明，真係莫名其妙，Sammi話事前唔知安仔嚟，但見到都冇所謂。

合唱特別有Feel

問到喺音樂會度係咪會同安仔合唱？Sammi話：「其實我個人意願係想喺安仔演唱會度先合唱，咁樣意義更大，當然對公司嚟講呢個係噱頭，但我唔想個騷焦點落喺我哋身上，對其他人唔公平。」Sammi擺明暗示唔想喺今次音樂會同安仔合唱。但講到同安仔再合唱會有乜感覺？Sammi坦言話會特別有feel，不過相信大家都會明，唔使攞條腸畀大家睇。
安仔話同Sammi同一意見，唔想今次焦點放喺佢兩個身上，佢話：「喺Sammi演唱會度唱都可以㗎。」