港股上周再創新高，恒指由6月低位15204.86，升到上周五收19260.3，升咗26.67%；H指更巴閉，6月仲喺5864.40低位，上周五收8591.09，升幅達46.5%！好彩揸咗指數龍頭股嘅散戶，笑到見牙唔見眼；唔好彩嘅……揸住弱勢指數股，真係一殼眼淚。邊隻弱勢指數股咁唔爭氣？地鐵（066）是也。
地鐵6月低位17.80元，上周五收19.42，5個半月只升得嗰9.1%，奀到痹，難怪散戶要上網大鬧，以洩心頭之憤。到底隻股係咪真係咁唔掂？
「香港討論區」內，高老二上周五晚大發牢騷：「資金避難第一隻唔好揀呢隻昆人精。66啲車廂日日都迫爆，腳毛都插唔到條入去！仲話上車避難？……快啲搵過第二部車避難。走鬼要走得快！唔好留低！」
Wendy521亦係苦主：「俾佢『責』住啲錢，7月到𠵱家都係在$18x-$19x徘徊，浪費晒啲opportunitycost！」
投資王就最樂觀：「組合在19.32已買入。走勢出現突破。」
外星使者喺度火上加油：「上203呠呠車咪冇事囉，哈！」
dinocwh踩多一腳：「啲垃圾要搵人掃先得喎。」

本欄10月3日講過呢隻股有個特性，就係每次圖表上即使見到個好完美嘅向上形態，股價都要吽好耐至爆上，呢啲「好完美嘅向上形態」，由02年到今已經出現過幾次，如果冇耐性，一早俾佢悶走咗。上周四，隻股又出現好誘人嘅入市訊號，當日以大成交一度升破4月開始伸延嘅三角形下降軌，雖然收市未能守穩，但上周五市勢咁飄忽，隻股依然硬淨，係好現象。加上今次又係圓底兜上，更加惹人憧憬。不過，講到尾都係嗰句，揸呢隻嘢要好有耐性，要預佢繼續喺19至21蚊之間拉扯一大輪，至有力向上衝，三角形量度升幅可見23.50元。
余文