今日見報的五十隻藍籌月供統計，不少網友關注昔日過氣藍籌表現，股榮整理過後，結果也嚇了一跳。

過去十年，共有約十隻藍籌被剔出成份股之列，以會德豐(020)為例，縱使2005年已被剔走，惟當年倘繼續每月供一萬，直至去年底，本金120萬元，累積收息20萬，所持股份數目賬面值219萬元，賬面賺120萬元。表現最好的是長江基建(1038)，收息亦相當可觀，08年剔出賴死唔走，今日賬面賺130萬元。

最令人意外是電盈(008)，8號仔千禧年世紀巨刁，2002年更五合一，股價急插無水花。但由2005年開始玩月供，直至去年底，120萬元本金合共買入34.5萬股，累積收息達43萬元，目前賬面賺86萬元。電盈05年底股價(未計除淨價)，其實與現價相若，但09年股價跌穿2元，造就低位買入大量股份，因此在平均成本法效應，財息兼收。

被剔走藍籌，有四隻賬面見紅，輸得最慘的是思捷(330)，120萬本，現值只有41萬。花無百日紅，騰訊(700)十年間由120萬變成1,900萬；昔日神話股思捷亦可以由120萬變41萬；8號仔則死唔斷氣、復派高息，唔俾你睇死。

在投資的世界裡，NeverSayNever。

股榮
https://www.facebook.com/stockwing1

P.S.有關現有及昔日藍籌月供計算方法，包括以下四點：1)計及紅股及拆股(拆細)因素、2)中資股2008年開始九折收息、3)如果股份有供股，選擇不供，4)未計任何月供手續費