大時代！真係瘋狂大時代！港交所（388）無端端又狂扯23.50元，勁升12%，收報219.20元。坊間傳媒追訪股海各方人等，全都對港交所股價忽然大升表示「不知道有任何原因」，即係話統統對今次狂挾搞不清楚。
睇炒股機炒股，赫見港交所往績PE高達93倍！再升多幾元就肯定過100倍PE，再睇多幾隻近期當炒股份的PE，紫金礦業（2899）近百倍、南航（1055）323倍……連星俠愛股之一中國財險（2328）現價都升逾70倍。以上情景令星俠憶起97年時紅籌股風暴，幾乎所有「染紅」股份都癲炒至幾百倍PE，甚至過千倍PE都有，之後股市就……。
雖然今次牛市大時代之中，不少股份升勢背後因素有盈利增長所支持，與10年前純炒概念而缺乏業績支持不盡相同，但今次狂升最大導因還是資金氾濫，若然以資金因素衡量，股海現時狀況實不宜與當年直接比較，只是任何股份升勢太急背後由資金推動，難免進銳退速，普羅股友應保持冷靜。

值得冷敲

大升浪惠及所有國企股，尚未炒上者遲早獲資金垂青。中石化（386）整系表現不俗，尚有一隻滄海遺珠中石化冠德（934）。該股今年中曾有追捧，一度炒上3.20元，之後調整至1.85元呈「雙底」反彈，止於2.60元後轉趨牛皮橫行；近日成交漸增，料有資金部署大炒落後，畢竟冠德亦有機會受惠系內重組，可以冷敲，跌穿2.20元止蝕。