張堅庭30年前身在北京飯店，於6月3日晚上至6月4日經歷了一段難忘的時刻，聽到窗門砰砰嘭嘭，又聽到猶如「掌聲」的坦克車行走聲，最後張堅庭決定與友人回港，英國記者示意張堅庭離開，張堅庭就回房，跟兩友人商量說：「唔對路喎！」他稱當時已是早上六時許，三人到酒店大堂，決定馬上就走，兵分三路找車，結果找到一輛的士，先議好到機場的行車路線。

沿路張堅庭見到有燒焦的地方，司機一邊激動地憶述3日晚上所見種種。途中張堅庭又見到很多軍車，司機激動時更想撞過去。最後順利到達機場。

由於當時新聞封鎖，資訊流通困難，故機場人員似乎不大了解持續了一晚的大屠殺。張堅庭說：「好奇怪，機場好似完全唔知出面乜嘢事發生，過海關時完完全全冇問題，又唔會睇你啲行李，佢哋好似啱啱瞓醒咁，好似唔係好大件事，我諗可能收音機冇播，你以為係一啲騷亂，因為學生運動都持續咗好耐，如果你冇電話、唔睇電視，根本唔知道乜嘢事發生。」

本以為一切順利，豈料返港航班「大機變細機」，張堅庭三個大男人為搶得機位，「當時情況係好混亂，我哋三個大隻佬，完全係冇同情心，人性最差嘅走晒出嚟，推開啲人，我就去換飛。」

張堅庭謂，六四屠城很多細節，也是返港才知。「當時喺現場，我有一種好詭異嘅感覺，今夜星光燦爛，好似一個騷咁，北京飯店睇到嘅嘢。」返港後他一度掙扎是否將「六四」加入《表姐！你好嘢》劇本中，寫了兩三場，經反覆思量後最後都刪掉，因為《表姐》屬喜劇，加入「六四」情節，似頗不合；也不希望電影有明顯時間性。

接著近兩年，張堅庭回想「六四」情景、及綜合所得之消息，「有一種很莫明嘅激動……有時揸揸吓車，會突然喊十幾分鐘然後停。咁樣持續咗年幾兩年。」

「抓住了歷史悲劇的尾巴」的張堅庭，在「六四三十」，第一次留下歷史紀錄，「一個香港嘅後生仔，30年前，我都係卅幾歲，當時喺嗰個環境裡面，記錄咗嗰段時間。雖然記憶有啲模糊，但某啲場面，事件本身，係我一生人唔會忘記。」

「毋忘六四。基本上我覺得，唔係政治立場問題，而係人類應該有嘅道義，如果我哋生活喺一個公民社會，應該有嘅道義，多謝各位。」

Part 1：「喂，軍隊入城！」張堅庭憶卅年前：裝甲車飆向天安門廣場
https://bit.ly/317V0hC

Part 2：記者訊息好混亂 張堅庭稱唔係講笑：死好多人
https://bit.ly/2QMgY4T

Part 3：張堅庭稱聽到掌聲 記者放下攝影機：是坦克！
https://bit.ly/2ERTt5F

Part 4：毋忘六四 張堅庭稱並非政治立場問題
https://bit.ly/2Kos3YR
--------------------------------
【六四30】守住歷史 拒絕遺忘
https://hk.adai.ly/zdzKtt2RiW
--------------------------------
【記住63836568】全民爆相爆片！下一個爆料王就係你
https://bit.ly/2Guolu9