長實發展部高級助理策劃經理游榮昇話，物業好先進，十五層寫字樓，每層分十六區，每區可二十四小時獨立調較冷氣，慳番唔少冷氣費。
而七至九樓三層商場共三十六萬呎，有二百個舖位，面積一千到四萬呎，其中七樓萬三呎大堂用作舉辦大型展覽、車展或音樂會。
商場最吸引蘭西嘅地方，就係九樓，將有一條置業街。長實話，會預留部分舖位作樓盤示範單位展銷場，餘下舖位就租畀與置業、家居生活同布置有關商戶，商場每層約十二萬呎，如果長實最終用晒全層，可能有機會問鼎全港最大樓盤展銷場。不過長實𠵱家喺紅磡幾個商場內都已經闢出示範單位同售樓處，重要再整多個，睇嚟真係有好多盤要推。
新盤宣傳唔使等賣樓紙
政府早幾年已陸續取消限制炒樓措施，𠵱家更再畀方便發展商，等佢哋可以早啲搞宣傳活動吸引市民注意。只要攞到批文，喺賣樓紙批出前，就可展開一連串宣傳攻勢，包括派發樓盤資料，喺報紙、電台及電視台賣廣告，畀市民參觀示範單位及模型，同埋搞啲比賽或活動等，當然價單一定唔可以喺未攞賣樓紙前公布啦。
但係政府話明呢段期間，發展商唔可以同市民簽任何臨時買賣協議，或預留單位文件，唔可以收預留單位費或訂金等活動。如果收到任何有關售樓處秩序或宣傳資料有誤導等投訴，政府都會立即叫停。