八方唔少朋友嘅五歲大仔女，唔係顧住食就係掛住玩，從來冇好似特首梁振英口中嗰個五歲咁有遠見，會問：「行政長官，我長大後住喺邊？香港仲有冇足夠土地？」難怪有人質疑呢位五歲童，或者神童，係咪梁振英幻想出嚟嘅呢？噚日立法會答問大會，工業界議員林大輝先喺會上指五歲童係虛構，自由黨田北俊會後接力撐準黨友大輝，模擬孫女同佢嘅對話，夭潤CY一番。
衞生服務界議員李國麟噚日學梁振英，喺答問大會話有個五歲童託佢問特首，特首係咪會規管學生應該同唔應該睇乜嘢書？當梁振英不對題地回應年輕人應有廣闊思想空間後，李國麟追問時竟然話個五歲童啱啱打電話追問佢，應唔應該擔心將來嘅學術自由？呢個時候大輝終於忍唔住插嘴：「主席，我認為特首同李國麟嘅五歲童故事都係虛構嘅，究竟我哋應唔應該喺立法會討論一啲虛構嘅事？」換來全場爆笑，李卓人加把嘴：「我投訴林大輝冒犯689，話佢講大話！」

有小童當梁特係靚女

林大輝靚抽後，田少會後接力，話自己五歲嘅孫只會同佢講去邊度滑雪，「五歲會講咁嚴肅（住屋）嘅嘢？我真係唔信嘞」。其後仲模擬同孫女嘅對話，引證要虛構同小朋友嘅對話，有幾咁難？
八方問過特首辦，五歲童到底係咪真有其人？發言人話「冇補充」。八方亦喺街頭試吓搵唔搵到梁振英口中對未來充滿願景嘅五歲神童，但差唔多年紀嘅八個小朋友中，半數唔知梁振英係乜水，另一半雖然知，但一聽到個名就扁嘴，有一個話鍾意佢，「因為佢係一個靚女」，呢啲先似五歲童會講嘅說話囉。

李八方
mailto:[email protected]