一眾有份競逐《新城勁爆頒獎禮2019》歌手，包括林欣彤（Mag）、黃妍今日分別到新城電台拉票宣傳，頒獎禮活動將於本月28號（星期六）下午進行。

林欣彤今年有3首歌競逐頒獎禮，對歌曲有信心，27號她會在麥花臣舉行演唱會，昨日首次與樂隊綵排，有部份歌曲經重新編曲帶給觀眾驚喜。下半年受社會運動影響連串演唱會取消，林欣彤說︰「希望順順利利，大家開開心心睇個騷，感恩能夠開得成，啲飛之前賣爆哂，多謝大家支持。」雖然今次只演一場試水溫，但亦心滿意足。不過由於要開騷關係，令林欣彤今個聖誕節要閉關，她說︰「24號要綵排，之後要調整心情迎接個騷，冇得玩又冇得食，要戒口養聲。」

黃妍宣傳新歌《刮骨》，透露早前到台灣一星期和台灣團隊創作新歌，極速地花了三日時間譜出四首新歌樣本，意想不到的快手，若公司對新歌合意，會在明年推出。黃妍在台灣享受工餘時間，但竟失望而回，並說︰「每次去台灣都會飲一間指定珍珠奶茶，不過執咗笠，搵唔到替代品好失望，唔夠完美。」另外一個深刻偶遇是和台灣同事食飯竟見到偶像魏如萱（娃娃），黃妍說︰「佢認得我，曾經有次佢喺我版面留言，開心到尖叫加大喊。」

採訪、攝影：卓寶花

-----------------------------
《2019高級珠寶鑑賞誌》
點擊即睇過百款鑽飾名錶
-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇