高官落區大龍鳳暫告一段落，究竟呢班司、局長有乜得着？八方都諗唔到，但奇遇就肯定唔少。好打得嘅林鄭月娥去荃灣做騷，竟然遇上癡心女fans……呀，應該係請願人士至真，足足企喺場外等咗成個幾鐘，為嘅就係等林鄭座駕離開時飛撲上前遞請願信。

皇天不負有心人，佢竟然成功開到林鄭嘅車門，嚇到在場工作人員標晒冷汗，急急飛身閂番門，難得林鄭竟然繼續淡淡定開窗接信，聽癡女訴說成分鐘「心事」，包括「廉署包庇貪污」等先至走人。
運輸及房屋局局長張炳良都唔弱，獲到場請願嘅富安花園居民送贈「痰罐」，希望張炳良明白，佢哋個屋苑附近即將起個污水處理廠，希望局長一齊感受吓，將來會有幾臭咁話喎，認真用心良苦。
至於民政事務局局長曾德成，噚日就殺入禮頓山社區會堂聽民意時。嘩，肥龍就係因為獲郭氏兄弟安排、免費租住禮頓山豪宅而出事喎，難得曾德成不避嫌大讚發展禮頓山嘅發展商、即係新鴻基地產肯協助政府興建社區會堂係非常難得，唔通想讚新地都算良心地產商？