開鑼日（2日）有人歡喜有人愁，利敬國喺尾場騎「世界紀錄」展現「巴基之星」式後勁，直路由包尾位置撲上，最後一步壓贏「大籐王」贏馬。

相反，「大籐王」嘅騎師Ironman郭能就失運，連同較早場次嘅「海明珠」輸短頭，呢日兩個亞軍都只係輸少少，而星期日（9日）一班1400米廣東讓賽盃，匆出的「大籐王」會改配韋達，真係只嘆無可奈何。

Ironman今晚（5日）谷戰只得三匹座騎，其中第三場四班1000米匹「威先生」，上季尾同程僅以0.75個馬位輸俾「勁飛聖」，今場冤家路窄再碰頭，「威先生」排最外10檔，加上有「蔡神仙」隻不明物體「鄉村瑰寶」，但Ironman並唔太擔心，佢反而話真正嘅冤家係「要風得鋒」。

「威先生」上場飲恨，搞到Ironman一肚氣，原來係「威先生」放出後，當晚潘明輝策「要風得鋒」唔放過佢，一直喺「威先生」外側拍實鬥燒，「要風得鋒」最後直路腳軟只得第十，但「威先生」跑到最後100米先開始減弱，埋門被「勁飛聖」追過，屈居亞軍。

Ironman直言如果「威先生」冇被對手燒足大半程，用多咗力，戰果早已改寫，「要風得鋒」今場抽3檔配十磅仔黃俊，似乎會繼續採取主動跑法。「仇家」碰面，會唔會又漁人得利呢？