【昔日神童】蔡明紹元神歸位 密謀拆禮物日再贏孖寶
蘋果日報 2019/12/26 16:56
谷草孖寶蘇保羅蔡明紹拆禮物日起孖
蔡明紹今季回勇
蔡明紹今季成績唔錯，暫時贏出11場頭馬，比起上季全季只贏22場，現時馬季未過一半，但已有去季頭馬數目一半，反映今季這位昔日神童有歸位跡象。
老實講，蔡明紹騎功唔差，唔係都唔會以極速畢業成為大師傅，又以「加州萬里」贏到國際賽香港盃，既然佢元神歸位，當然可繼續爭取更多頭馬。
上年拆禮物日（26日）跑馬，他以「塑料喜」和「文藝學家」（已退役）雙喜臨門，今年當然希望可繼續起孖。
其整晚七匹谷草戰馬中，第六場「孖寶」值得優先關注。
「孖寶」由去季出道至今七戰全由蔡明紹主理，人馬合拍，加上今季馬匹踏入四歲更成長進步，季內三戰得冠亞季各一，前景可謂樂觀。
上場在谷草1200米打開勝門，表現不錯，現時馬匹大熟大勇，狀態在上佳水準。
是次縮程跑谷草1000米，季內一戰同程得亞軍，發揮一定合適，加上排在黃金一檔起步，形勢甚好，如一切順利，相信可爭取連捷。
至於上周三（18日）蔡明紹為方廐「飛雲騅」爆大冷掄元，今期二人又有一駒「好計」交易，亦有留意價值。