一般而言，1號馬都係全場最高分及負磅最重一駒，這天（10日）沙田一直不利重磅馬；呢個冧巴賽駒由頭場輸到第九場，其間最叻都不過係第五場「喜得福」跑第二。

卒之寶物沉歸底，跑到最尾第十場泥地三班1200米，由徐雨石馬房1號馬「皇龍大將」，負133頂磅在雷神莫雷拉胯下後上掄元，單Win及組合獨贏A3分別派81.5及21.5元。

六歲灰馬「皇龍大將」沿途守第七位，直路衝得強勁，克服重磅下贏0.5馬位，馬兒季內初出即報捷兼首勝泥地賽，徐雨石連同第四場由田泰安贏「電訊大炮」，個人連續第二次日賽起孖，於新馬季暫得五Win領先練馬師榜。

除了「皇龍大將」，雷神連同頭兩場分別勝出「歐洲巨星」及「七彩」，這天連中三元不讓田泰安專美，並以全日得3冠2亞1季，總分52分氣走只得36分的田泰安，繼開鑼日後再做騎師王。

第十場二至四名分別是「雲信凡高」、「皇仁大師」及「有心人」，四重彩派34萬幾，成為整日最冷場次。

開季至今表現最令人失望的是，45歲13屆香港冠軍騎師韋達。他跑了三個賽日共上陣11次，全不入三甲。